ထာဝရကျောင်းသားလို့ဝေဖန်ခံရတာကိုတုံ့ပြန်လိုက်တဲ့ ဇင်မျိုး

0
138

ဇင်မျိုးဟာ ကျောထောက်နောက်ခံပိုက်ဆံအနေအထားသိပ်မဟန်ခဲ့လို့သာ အရံဇာတ်ရုပ်တွေနဲ့ မင်းသားသူငယ်ချင်းကာရိုက်တာတွေကြား လူးလာခေါက်တုံ့ရင်းနာမည်ကြီးလာသူဖြစ်ပေမယ့် တကယ်တမ်းမှာ မင်းသားခန်းတွေချည်းရိုက်ရင်တောင်အောင်မြင်လောက်တဲ့အထိအနုပညာအရည်အချင်းရော ရုပ်ရည်ပါရှိသူဖြစ်သလို ပရိသတ်အားပေးမှုလည်းတခဲနက်ရရှိထားသူဖြစ်ပါတယ်။ ဇင်မျိုးက သိပ်မကြာခင်က မီဒီယာတွေနဲ့အင်တာဗျူးမှာ မင်းသားသူငယ်ချင်းဇာတ်ရုပ်တွေသရုပ်ဆောင်ရာမှာ ကျောင်သားအဖြစ်ပဲမြင်နေရလို့ ထာဝရကျောင်းသားကြီးတွေဆိုပြီးပရိသတ်ကဝေဖန်နေတာကို တုံ့ပြန်သွားခဲ့ပါတယ်။

ဇင်မျိုးက သူပါဝင်သရုပ်ဆောင်ထားတဲ့ “အဓိပတိလမ်းက နဂ္ဂတစ်များ”ဇာတ်ကားနဲ့ပတ်သက်ပြီး “ဒီအဓိပတိကားကတော့ ကျွန်တော်တို့ရိုက်ထားတာ လွန်ခဲ့တဲ့သုံးနှစ်ဝန်းကျင်ကပေါ့ ရိုက်ထားတဲ့ကားလေးပါ။ ကျွန်တော်တို့က အရွယ်ပြောင်းလာတာလည်းပါတာပေါ့နော်။ကျောင်းသားအနေနဲ့ရိုက်ထားတာမှ ကျွန်တော်က အဲဒီကားထဲမှာ ကျောင်းပျော်ကြီးပေါ့နော်။အသက်ကြီးတဲ့ကျောင်းပျော်ကြီးပေါ့။ အဲဒီနေရာကနေ ဝင်ရိုက်ရပါတယ်”လို့ ပြောပြထားပါတယ်။

ကျောင်းသားဇာတ်ရုပ်တွေရိုက်လာခဲ့တဲ့အတိတ်ကိုလည်းဇင်မျိုးက “ကျောင်းသားဇာတ်ရုပ်ကတော့ ကျွန်တော်ဟိုးအရင်တုန်းက ကိုသားကြီးတို့ ကိုလွင်မိုးတို့နဲ့လည်းရိုက်ခဲ့တာပဲ။ ကိုလူမင်းတို့နဲ့တုန်းကလည်း ကျွန်တော်သူငယ်ချင်းခန်းရိုက်ခဲ့တာပဲ။ မင်းမော်ကွန်းတို့နိုင်းနိုင်းတို့နဲ့လည်းသူငယ်ချင်းခန်းတွေရိုက်ခဲ့တယ်”လို့ ပြန်ပြောင်းသတိရထားပြီးသူငယ်ချင်းခန်းတွေတင်မက ဇာတ်ရုပ်စုံအောင်လည်းလုပ်ဖူးကြောင်းကို “သူငယ်ချင်းခန်းမှမဟုတ်ပါဘူး။ အခြားဟာတွေလည်းအများကြီးရိုက်ရပါတယ်။ အစ်ကိုတွေရော မောင်တွေရော ဒရာမာတွေရော ဟာသတွေရော မင်းသမီးပိုးခိုင်းတာတွေရော စုံနေတာပဲ။ အခုနောက်ပိုင်းကတော့ ပုံမှန်အရင်ကလို ကျောင်းသားသူငယ်ချင်းကားကတော့ ရှားလာပါပြီ”လို့  ပြောပြထားပါတယ်။

ထာဝရကျောင်းသားကြီးလို့ဝေဖန်နေကြတာတွေကိုတော့ ဇင်မျိုးက “ဒါကတော့ ပြောရမယ်ဆိုရင် အခုနောက်ပိုင်းမှာတစ်နှစ်တစ်ခေါက်တောင်မှကျောင်းသားမလုပ်ဖြစ်ပါဘူး။ အမြဲတမ်းလည်းကျောင်းသားခန်းမလုပ်ဖြစ်ပါဘူး။ ကျောင်းသားခန်းကတော့ ရှားလာပါပြီ။ ရှားလာပြီဆိုတာကလည်း အသက်နှစ်ဆယ်လောက်ကွာတဲ့မင်းသားနဲ့ သူငယ်ချင်းလုပ်မယ်ဆိုရင် ဒါရိုက်တာကရိုက်ခိုင်းမှာမဟုတ်ဘူး။ ဒါကတော့ ဟိုးအရင်တုန်းက ရိုက်တဲ့ကားတွေကိုကြည့်ပြီး ပြောကြတာဖြစ်မှာပါ”လို့ မှတ်ချက်ပေးထားပါတယ်။

ဇင်မျိုးက ရုပ်ရှင်ကားတွေရိုက်ပြီး နှစ်တွေကြာမှ ရုံတင်ခွင့်ရလို့၊ ချက်ချင်းရုံတင်ခွင့်မရလို့ဒီလိုဝေဖန်မှုတွေခံနေရတာလို့လည်းပြောသွားပါသေးတယ်။ ပြောချင်လွန်းလို့ပရိသတ်ကြီးရော ကျောင်းသားဇာတ်ရုပ်တွေနဲ့အတွေ့ရများတဲ့ဇင်မျိုးကို အားပေးကြလား။ ဇင်မျိုးရဲ့အခြားကာရိုက်တာနဲ့ဇာတ်ကားတွေထပ်ထွက်လာရင်ရောအားပေးကြမှာလား။ပြောခဲ့ကြပါဦး။

Can’t Wait To Say