ခြိမ့်ကေကိုအပေါ်အမြင်ကိုပြောပြတဲ့ ထျန်ပါး

0
138

အကျီင်္ဒီဇိုင်းအဆန်းကြီးတွေ သီဆိုမှုပုံ အဆန်းကြီးတွေ သီချင်းအဆန်းကြီးတွေ အဆန်းတကာ့အဆန်းဆုံးတွေကို ပရိသတ်တွေကို ချပြပြီး ပရိသတ် အားပေးမှုကို ရရှိထားတဲ့ အဆိုတော် ထျန်ပါးတယောက်ကိုတော့ အားလုံးသတိထားမိကြမှာပါ။ ထွက်လာတဲ့သီချင်းတိုင်း ဆန်းဆန်းပြားပြားလေး ဖြစ်ပြီး ဖက်ရှင်တွေကလည်း တခြားသူတွေနဲ့ လုံးဝကို မတူအောင် ဝတ်ပြနိုင်တဲ့ အဆိုတော် ထျန်ပါးကတော့ သူကြိုက်တာလေးတွေ သူ့ရဲ့လျှို့ဝှက်ချက်လေးတွေကိုတော့ ပရိသတ်တွေကို ပြောပြသွားခဲ့ပါတယ်။

ထျန်ပါးကတော့ Sunday Journal နဲ့ အင်တာဗျူးမှာတော့ လက်ရှိအသက်နဲ့ နုပျိုနေတာနဲ့ ပတ်သက်ပြီး “ကျွန်တော် အသက် ၅၀ ပြည့်တော့မှာပါ။ ဒါကတော့ ဘုရားသခင်ရဲ့ အလိုတော်လို့ပဲ ထင်တယ်။ စိတ်ထဲမှာ စိတ်ညစ်စရာတွေဆို ဘယ်တော့မှ မထားဘူး။ ပျော်ပျော်ပဲ နေတတ်တယ်။ နေ့တိုင်းကျမ်းစာဖတ်တယ်။ အစပ်တွေ အချိုတွေ အငံတွေ ရှောင်တယ်။ ရေတော့များများသောက်တယ်”

ဖက်ရှင်ပိုင်းနဲ့ ပတ်သက်ပြီး “ဖက်ရှင်ပိုင်းကတော့ ကိုယ့်ဟာနဲ ကိုယ်ဖန်တီးပြီးတော့ ဝတ်ပါတယ်။ အရင်တုန်းက ကမ္ဘာကျော် အဲ့ဗစ်ပရက်စလေ သူ့ရဲ့ဖက်ရှင်က ခုချိန်မှာကြည့်မယ်ဆိုရင်တောင် မရိုးနိုင်သေးဘူးဗျာ။ ပြီးတော့ မိုက်ကယ်ဂျက်ဆင် ပြီးတေ့ာ ဂန်းနန်းစတိုင်လ် သူတို့ဟာ ဘယ်လိုပဲ ဝေဖန်ဝေဖန် သူ့ဟာနဲ့သူလိုက်နေတာပါပဲ။ ကျွန်တော်က အဲ့လိုကြည့်ပြီးတေ့ာ ကိုယ့်ဟာနဲ့ကိုယ်ဖန်တီးပြီး ကိုယ့်ဟာနဲ့ကိုယ် ဝတ်မှ အဆင်ပြေမယ်လို့ ထင်ပြီးတော့ ဒီလိုဝတ်ဖြစ်တာပါ”

အကို့ရဲ့ အိုင်ဒေါလ် ဟီးရိုးတွေနဲ့ ပတ်သက်ပြီး ဘယ်သူတွေ ဖြစ်မလဲဆိုတဲ့အပေါ်မှာတော့ “ဖက်ရှင်နဲ့ပတ်သက်ရင်တော့ သူတို့သုံးယောက်ပဲ။ မိန်းကလေးမှာကတော့ လေဒီဂါဂါ ပါဗျာ။ သူပြီးရင်တော့ မြန်မာပြည်မှာဆိုရင်ဖြူဖြူကျော်သိန်းပါဗျာ။ ကျွန်တော်အမှန်တိုင်းပြောမယ်ဆိုရင် မန္တလေးမှာ ကျွန်တော်ရှိုးဆိုတုန်းက အောက်က လူတွေက ပုဆိုးပါကျွတ်တော့မလိုလိုနဲ့ ခုန်ပေါက်ပြီး အားပေးကြတာဗျာ။ Performance ကအစ ဖက်ရှင်က အစ အကုန်အရေးကြီးပါတယ်”

ဂီတနဲ့ ပတ်သက်ပြီး ဘယ်လို လေ့လာဖြစ်လဲဆိုတဲ့ အပေါ်မှာတော့ “ဂီတနဲ့ ပတ်သက်ရင်တော့ ကျွန်တော်ဖြေထားသလောက် အဖေက ငယ်ငယ်ကတည်းက ကျွန်တော့်ကို သီချင်းဆိုခွင့်မပြုဘူး။ အမေကတော့ ခွင့်လွှတ်တယ်။ ခုချိန်မှာ အဖေရှိမယ်ဆိုရင်တော့ တော်တော်ဝမ်းသာနေမှာဗျာ။ ကမ္ဘာကျော်အဆိုတော်တွေကို ကြည့်သူတို့ အသက် ၇၀ လောက်ရှိတဲ့အထိကို သီချင်းတွေက ဆိုနိုင်သေးတယ်။ ပြီးတော့ မြန်မာပြည်မှာ ဆိုရင်တော့ ဦးသိန်းတန်ဖြစ်မယ်ထင်တယ်။ ခုချိန်ထိကို လူတွေက သဘောကျနေတုန်းပဲ။ ကျွန်တေ်ာကတော့ အသက် ၆၀ လောက်အထိကို ဆိုနိုင်မယ်လို့ မျှော်လင့်ထားပါတယ်။ အသက်လည်း ၆၀ လောက်ထိ ဘုရားသခင်က ရှင်ခွင့်ပေးရင် အဲ့အချိန်ထိ အနုပညာလုပ်ပါမယ်”

ခြိမ့်ကေကိုနဲ့ ပတ်သက်ပြီး မြင်တဲ့အမြင်အပေါ်မှာတော့ “သူခံစားချက်နဲ့သူလုပ်တာကြောင့် ကျွန်တော်ကတော့ အားပေးတယ်ဗျာ။ ကိုယ်ခံစားချက်နဲ့ ကိုယ့်ကိုကိုယ် ယုံကြည်မှုရှိပြီးတော့ ကိုယ့်ပရိသတ်တွေကို ကောင်းကောင်းမွန်မွန်ဖျော်ဖြေနိုင်တာကို ကြိုက်ပါတယ်။ သူကရိုးသားပါတယ်။ သူ့ရဲ့ မမရေ သီချင်းကိုလည်း ကြိုက်တယ်ဗျာ”

“နောက်ထပ် သီချင်းအသစ်တွေ ချပြချင်တာကတော့ အများကြီးပါပဲ။ ကျွန်တော် အသက် ၆၀ လောက်ထိကို တတ်နိုင်သလောက် အနုပညာလုပ်ဖို့ရှိပါတယ်။ ပရိသတ်တွေအားလုံးလည်း ဘုရားသခင်ကောင်းချီပေးပါစေ” ဟု ပြောကြားသွားခဲ့ပါတယ်။